by Artyom
Сёння, 8 лютага 2025 года, ва Украіне пройдзе фінал Нацыянальнага адбору на «Еўрабачанне 2025». Улічваючы, што Беларусь больш не ўдзельнічае ў конкурсе, многія беларусы сочаць за ўкраінскім адборам, падтрымліваючы суседнюю краіну.
Фіналісты адбору
- Влад Шэрыф — «Wind of change»
- Абіе — «Дім»
- MOLODI — «my sea»
- Future Culture — «Waste My Time»
- Маша Кандраценка — «No Time to Cry»
- KHAYAT — «HONOR»
- FIЇNKA — «Культура»
- KRYLATA — «STAY TRUE»
- Ziferblat — «Bird of Prey»
- ДК Энергетык — «Сіль»
Гурт Ziferblat удзельнічае ў адборы з кампазіцыяй «Bird of pray». Гэта іх другая спроба прадставіць Украіну на «Еўрабачанні». У мінулым годзе гурт заняў другое месца ў адборы, і сёлета многія называюць фаварытамі менавіта іх.
Гурт MOLODI выступіць з песняй «my sea». Ваня і Кірыл, удзельнікі гурта, прысвяцілі сваю конкурсную кампазіцыю страчанаму дому. Хлопцы родам з Марыупаля, які з 2022 года знаходзіцца пад акупацыяй Расеі.
Маша Кандраценка, вядомая многім па TikTok-хіту «Ванька-Встанька», прадставіць песню «No time to cry». Фанаты конкурсу і журналісты таксама называюць яе адной з фаварытак сёлетняга адбору.
Вызначэнне пераможцы
Пераможца нацыянальнага адбору на «Еўрабачанне 2025» будзе вызначацца шляхам сумеснага галасавання прафесійнага журы і гледачоў. Прафесійнае журы складаецца з трох чальцоў, якіх абралі самі ўкраінцы праз галасаванне ў дадатку «Дія». У гэтым годзе ў склад журы ўвайшлі:
- Джамала — пераможца «Еўрабачання 2016»;
- Сяргей Танчынец — лідар гурта «БЕЗ ОБМЕЖЕНЬ»;
- Кацярына Паўленка — фронтвумэн гурта «Go_A».
Гледачы змогуць галасаваць праз спецыяльны дадатак «Дія». Галасы прафесійнага журы і гледачоў будуць суміраваны, і канчатковы вынік вызначыць пераможцу адбору і прадстаўніка Украіны на «Еўрабачанні 2025» ў Базэлі.
Дзе глядзець адбор
Улічваючы палітыку Нацыянальнай Грамадскай Тэлерадыёкампаніі Украіны, арганізатара адбору, беларусы ў Беларусі змогуць паглядзець трансляцыю толькі на афіцыйным YouTube-канале «Еўрабачання» і толькі з перакладам на ангельскую мову. Для беларусаў замежжа даступна арыгінальная трансляцыя на ўкраінскай мове на афіцыйным YouTube-канале «Eurovision Ukraine». Пачатак трансляцыі запланаваны на 18:00 па кіеўскім часе.
